ಪ್ರಮುಖ ರಾಜ್ಯ

ಮೂರು ಬಾರಿ ಗೆದ್ದ ಕರಾವಳಿಯ ಕುವರನಿಗೆ ‘ಕರುನಾಡ ಕಮಲಪೀಠ’

ಮಂಗಳೂರು: ಮೂಲತ: ದಕ್ಷಿಣ ಕನ್ನಡ ಜಿಲ್ಲೆಯ ಪುತ್ತೂರು ತಾಲೂಕಿನಲ್ಲಿ ಬರುವ, ಮೊನ್ನೆ ಮೊನ್ನೆಯಷ್ಟೇ ಕಡಬ ತಾಲೂಕಿಗೆ ಸೇರ್ಪಡೆಗೊಂಡ ಪಾಲ್ತಾಡಿ ಗ್ರಾಮದ ಮಂಜುನಾಥ ನಗರದ ಪಕ್ಕದಲ್ಲಿರುವ ಕುಂಜಾಡಿ ಎಂಬ ಪುಟ್ಟ ಹಳ್ಳಿಯಿಂದ ಮೇಲೆದ್ದು ಬಂದ ನಳಿನ್ ಕುಮಾರ್ ಕಟೀಲ್ ಗೆ ಈಗ ರಾಜ್ಯ ಬಿಜೆಪಿ ಅಧ್ಯಕ್ಷ ಪಟ್ಟ ಒಲಿದು ಬಂದಿದೆ.

ಸತತ ಮೂರನೇ ಬಾರಿಗೆ ಸಂಸದರಾಗಿ ಆಯ್ಕೆಯಾಗಿ ಈಗಷ್ಟೇ ಮೂರು ತಿಂಗಳು ಕಳೆದಿದೆ.‌ ಆಗಲೇ ನಳಿನ್ ಕುಮಾರ್ ಕಟೀಲ್ ಎಂಬ ಪಕ್ಕಾ ಆರೆಸ್ಸೆಸ್ ಹುಡುಗನಿಗೆ ಕೇಸರಿ ಬ್ರಿಗೇಡ್ ನ‌‌ ಕಮಾಂಡರ್ ಹುದ್ದೆ ಸಿಕ್ಕಿದೆ. ಈ ಮೂಲಕ 39 ವರ್ಷ ಪ್ರಾಯದ ಬಿಜೆಪಿಗೆ ಕಿರಿಯ ವಯಸ್ಸಿನ ಅಧ್ಯಕ್ಷರು ಸಿಕ್ಕಿದ್ದಾರೆ.

ಬಿಜೆಪಿಯ ಭದ್ರಕೋಟೆಯಾದ ದಕ್ಷಿಣ ಕನ್ನಡದವರಿಗೆ ಬಿಎಸ್ ವೈ ಮಂತ್ರಿ ಮಂಡಲದಲ್ಲಿ ಒಂದೇ ಒಂದು ಸ್ಥಾನ ಸಿಕ್ಕಿಲ್ಲ ಎಂಬ ಕೊರಗು ಮಂಗಳವಾರ ಬೆಳಗ್ಗಿನಿಂದ ರಾತ್ರಿ 8.45ರ ವರೆಗೂ ಕಾಡಿದ್ದು, ವ್ಯಾಪಕ ಚರ್ಚೆಗೆ ಒಳಗಾಗಿತ್ತು. ಆಗಲೇ ದಿಲ್ಲಿಯಿಂದ ಬಿಜೆಪಿ ಹೊರಡಿಸಿದ ಆದೇಶ ದಕ್ಷಿಣ ಕನ್ನಡದ ಕೇಸರಿ‌ ಪಾಳಯದಲ್ಲಿ ಹೊಸ ಹುಮ್ಮಸ್ಸು ಮೂಡಿಸಿದೆ.

ಸುಳ್ಯ ವಿಧಾನಸಭಾ ಕ್ಷೇತ್ರದ ಅಂಗಾರ ಅವರಿಗೆ ಆರು ಬಾರಿ ಶಾಸಕರಾದರೂ ಮಂತ್ರಿ ಸ್ಥಾನ ಸಿಗದೇ ಇದ್ದರೂ ಅದೇ ಸುಳ್ಯ ವಿಧಾನಸಭಾ ಕ್ಷೇತ್ರಕ್ಕೆ ಸೇರಿದ ನಳಿನ್ ಕುಮಾರ್ ಅವರಿಗೆ ಪಕ್ಷದ ರಾಜ್ಯಾಧ್ಯಕ್ಷ ಹುದ್ದೆ ಸಿಕ್ಜಿದೆ.
ನಳಿನ್ ಕುಮಾರ್ ಅವರ ಹೆಸರಿನಲ್ಲಿ ಕಟೀಲ್ ಎಂಬ ಹೆಸರಿದೆ. ಹೇಳಿ ಕೇಳಿ ನಳಿನ್ ಕುಮಾರ್ ಕಟೀಲ್ ದೇವಿಯ ಭಕ್ತ. ತಮ್ಮ ಬಹುತೇಕ ಭಾಷಣದ ಆರಂಭದಲ್ಲಿ ಅವರು ‘ ಕಟೀಲ್ ದ ಅಪ್ಪೆ ಉಳ್ಳಾಲ್ತಿನ್ ಸುಗಿತೊಂದು…. ‘ ಎಂದು ತುಳುವಿನಲ್ಲಿ ಹೇಳುತ್ತಾರೆ.

ಇಷ್ಟಿದ್ದರೂ ನಳಿನ್ ಕುಮಾರ್ ಮೂಲತ: ಕಟೀಲಿನವರಲ್ಲ. ಇವರು ಪುತ್ತೂರಿನ ಹುಡುಗ. ಇಲ್ಲಿನ ಸಂತ ಫಿಲೋಮಿನಾ ಸಂಸ್ಥೆಯ ಹಳೆ ವಿದ್ಯಾರ್ಥಿ. ಪಾಲ್ತಾಡಿ ಗ್ರಾಮದ ಕುಂಜಾಡಿಯಿಂದ ಬೆಳೆದ ಬಾಲಕ ಪುತ್ತೂರಿನಿಂದ ಹೊರ ಹೋದ ಬಳಿಕ ಆರೆಸ್ಸೆಸ್ ಕಾರ್ಯಕರ್ತರಾಗಿ ಮಂಗಳೂರಿನಲ್ಲಿ ಗಟ್ಟಿಯಾದರು. ಈ ನಡುವೆ ನಾನಾ ಧಾರ್ಮಿಕ ಉತ್ಸವಗಳು, ಯಾಗಗಳ ನೇತೃತ್ವ ವಹಿಸಿಕೊಳ್ಳುವ ಮೂಲಕ ಜನಮನ್ನಣೆ ಗಳಿಸಿದರು.

2009ರಲ್ಲಿ ನೇರವಾಗಿ ಮಂಗಳೂರು ಲೋಕಸಭಾ ಕ್ಷೇತ್ರದಿಂದ ಬಿಜೆಪಿ ಟಿಕೆಟ್ ಸಿಕ್ಕಿದಾಗ ರಾಜಕೀಯ ಆಸಕ್ತರೆಲ್ಲ ಅಚ್ಚರಿ ಪಟ್ಟಿದ್ದರು. ಕನಿಷ್ಢ ಗ್ರಾಪಂ ಚುನಾವಣೆಯಲ್ಲೂ ಭಾಗವಹಿಸದ ಕಾರ್ಯಕರ್ತನಿಗೆ ಎಂ. ಪಿ. ಟಿಕೆಟ್ ಸಿಕ್ಕಾಗ ಹೊಸ ಶಕೆಯೆ ಆರಂಭಗೊಂಡಿತ್ತು.

2014ರಲ್ಲಿ ಪಕ್ಷದೊಳಗೆ ಸ್ಪರ್ಧೆಯಿದ್ದರೂ ಎರಡನೇ ಬಾರಿಗೆ ಟಿಕೆಟ್ ಗಳಿಸುವಲ್ಲಿ ಯಶಸ್ವಿಯಾದ ನಳಿನ್ ಜಯಭೇರಿ ಮುಂದುವರಿಸಿದರು. ಮೂರನೇ ಬಾರಿ ಮತ್ತೆ ಟಿಕೆಟ್ ಫೈಟ್ ಭರ್ಜರಿಯಾಗಿದ್ದರೂ ನಳಿನ್ ಮತ್ತೆ ಟಿಕೆಟ್ ಒಲಿಯಿತು. ಹಲವು ಮೈನಸ್ ಗಳ ನಡುವೆಯೂ ಮೋದಿ ಅಲೆ ಈ ಬಾರಿಯೂ ನಳಿನ್ ಜೈತ್ರ ಯಾತ್ರೆಯನ್ನು ಮುಂದುವರಿಸಿತು.

ಮೂರು ಬಾರಿ ಗೆದ್ದ ಸಂಸದನ ಸಂಭ್ರಮದಲ್ಲಿ ಇರುವಾಗಲೇ ನಳಿನ್ ಗೆ ರಾಜ್ಯಾಧ್ಯಕ್ಷತೆ ಒಲಿದಿದೆ. ಈ ಮೂಲಕ ಕುಂಜಾಡಿ ಎಂಬ ಹಳ್ಳಿಯಲ್ಲಿ ಸಂಭ್ರಮ ಆವರಿಸಿದೆ.

ಕೇರಳ ಬಿಜೆಪಿ ಸಂಘಟನೆಯಲ್ಲಿ ವಹಿಸಿದ ಪಾತ್ರ ನಳಿನ್ ಗೆ ವರದಾನವಾಗಿದೆ ಎಂಬ ಮಾತು ಕೇಳಿ ಬರುತ್ತಿದೆ. ಜತೆಗೆ ಬಿಜೆಪಿ ರಾಷ್ಟ್ರೀಯ ಕಾರ್ಯದರ್ಶಿ ಸಂತೋಷ್ ಅವರ ಅಪ್ಪಟ ಶಿಷ್ಯನಾಗಿರುವುದು ಕೂಡ ಬಹುದೊಡ್ಡ ವರದಾನವಾಗಿದೆ.

ಸಂಘದ ಶಕ್ತಿ ಕೇಂದ್ರವಾದ ದ.ಕ. ದಲ್ಲಿ ಬಿಜೆಪಿ ಕೋಟೆ ಶಿಸ್ತುಬದ್ಧವಾಗಿ ಬೆಳೆಯುವ ಮೂಲಕ ರಾಜ್ಯದ ಇತರ ಜಿಲ್ಲೆಗಳ ಬಿಜೆಪಿ ಸಂಘಟನೆಗೆ ಮಾದರಿಯಾಗಿದೆ. ಈ ಅನುಭವ ನಳಿನ್ ಗೆ ರಾಜ್ಯದಲ್ಲಿ ಪಕ್ಷ ಕಟ್ಟಲು ನೆರವಾಗಬಹುದು ಎಂದು ಅಂದಾಜಿಸಲಾಗಿದೆ.

Related posts

ದಿಲ್ಲಿಯಲ್ಲಿ ಸತತ 3ನೇ ಬಾರಿ ಆಪ್ ಸರಕಾರ; ಬಿಜೆಪಿ-8, ಕಾಂಗ್ರೆಸ್ ಶೂನ್ಯ

Upayuktha

ಕೋವಿಡ್-19 ಮತ್ತು ರೋಗ ನಿರೋಧಕ ಶಕ್ತಿ ಹೆಚ್ಚಿಸಲು 19 ಸಲಹೆಗಳು

Upayuktha

ಬೆಳ್ತಂಗಡಿ: ಬೆಳಾಲಿನ ಖ್ಯಾತ ಶಿಲ್ಪಕಲೆ ಕಲಾವಿದ ಶಶಿಧರ ಆಚಾರ್ಯಗೆ ಒಲಿದ ರಾಷ್ಟ್ರಮಟ್ಟ ಬಸವ ವಿಭೂಷಣ ಪ್ರಶಸ್ತಿ

Sushmitha Jain